NCCER
Болашақ дәнекерлеушілер үшін халықаралық деңгейге жол ашылды!
Х. Өзбекғалиев атындағы Маңғыстау жоғары политехникалық колледжінің «Дәнекерлеу ісі» мамандығы бойынша білім алушылары үшін керемет жаңалық!
NCCER (National Center for Construction Education and Research) стандарттары бойынша халықаралық аккредиттеу процессі аясында «APEC Training Center» компаниясы колледж «Дәнекерлеу ісі» мамандығы білім алушыларына халықаралық тәжірибеден өтуге үлкен мүмкіндік ұсынды.
2026 жылғы 13–30 сәуір аралығында APEC Training Center базасында колледж білім алушылары өндірістік тәжірибеден өтуді бастағанын мақтанышпен хабарлаймыз.
Халықаралық тағылымдамаға 5 білім алушы және арнайы пән оқытушысы Қ. Нұрқожа қатысуда. Қатысушылардың жатын орны мен тамақтану шығындарын APEC Training Center толық қамтамасыз етеді.
Бағдарлама аясында білім алушылар үшін келесі іс-шаралар қарастырылған:
• Дәнекерлеу цехындағы практикалық сабақтар: Барлық тәжірибелік жұмыстар халықаралық деңгейде ағылшын тілінде жүргізіледі, бұл студенттерге техникалық терминдерді тікелей іс жүзінде меңгеруге мүмкіндік береді.
• Кәсіби бағыттағы ағылшын тілі (ESP): Студенттер өз мамандығына қатысты арнайы лексиканы, қауіпсіздік техникасы мен халықаралық стандарттарды тереңдетіп оқиды.
• Өндірістік нысандарға таныстыру сапарлары: Серіктес компаниялардың ірі өндірістік алаңдарына ағылшын тіліндегі экскурсиялар ұйымдастырылады. Бағдарламаның басты артықшылығы- білім алушылар нақты жұмыс процесін көруге және шетелдік мамандармен тілдесуге берілген тамаша мүмкіндік!
Бұл — заманауи технологияларды меңгеріп, әлемдік еңбек нарығында бәсекеге қабілетті маман болуға бағытталған маңызды қадам!